Вести од соработката

Од 9 до 11 јули 2012 година во хотел Глигоров во Струмица ќе се одржи семинар на тема „Иновативни пристапи за вработување на младите“. На настанот ќе учествуваат претставници од институциите кои работат во областа на поттикнување на вработеноста кај младите во Македонија како и претставници од Регионот Долна Нормандија. Целта на семинарот е да се дискутира за актуелната економска ситуација со младите луѓе во Македонија и во Регионот Долна Нормандија.

Петчлена делегација предводена од градоначалникот на општината Флори на Орн, Марк Лесер, од 5 до 9 јули беше во посета на општина Карпош. Делегацијата беше официјално примена од градоначалникот на Општина Карпош, Стевчо Јакимовски. Во подолгата и срдечна средба, двајцата градоначалници изразија искрена желба за соработка на повеќе полиња како што се локалниот економски развој, млади, култура, одржливиот развој (транспорт, инфраструктура и екологија) како и демократија (локална демократија и половата еднаквост).

Во периодот од 18 до 22 јуни 2012 година, претставници на Француската национална асоцијација на градови со историја и уметност престојуваа во Република Македонија со цел да ја реализираат планираната јунска мисија од Оска 3 „Попис на културно наследство“.

Во Македонија престојуваа г-ѓа Лудивин Баску, координатор на активностите на Француската национална асоцијација и г-н Антоан Бругерол, архитект.

Во рамки на Оската „Туризам“, Центарот за институционален развој – ЦИРа и Регионалниот совет на Долна Нормандија организираа втора мисија во Регионот Долна Нормандија од 8 до 13 мај. Македонската делегација, составена од претставници на Министерството за локална самоуправа, Центарот за развој на југозападниот дел на Македонија на Македонија, Туристичката комора на Македонија, хотелскиот сектор и експерти од ЦИРа, имаше можност да се сретне со претставници на туризмот од Долна Нормандија.

Од 17 до 22 јуни 2012 година делегација од Француска национална асоцијација на градови со историја и уметност и градови со заштитени зони и сектори (ANVPAH&VSSP), ќе ја посети Македонија. Оваа мисија ќе се оствари како дел од децентрализираната соработка помеѓу Регионот Долна Нормандија и Македонија и во партнерство со Асоцијацијата на градови од Македонија со архитектонско наследство. 

На 12 јуни 2012 година во Скопје, се одржа вториот состанок на работната група на градовите и општините од Република Македонија кои се вклучени во соработка со локалните власти од регионот Долна Нормандија. На состанокот, организиран од страна на Канцеларијата на соработката од Македонија и Заедницата на единиците на локална самоуправа (ЗЕЛС), учествуваа претставници на општините на Карпош, Велес, Крушево, Берово и Дебар.