Работилница за анализа и стратешко планирање за развој на културата во регионот Пелагонија

Битола беше домаќин на работилницата во времетраење од четири дена на која земаа активно учество триесетина претставници на културниот сектор од сите девет општини на Пелагонискиот регион (претставници од општините одговорни за култура, јавните културни институции, здруженија на граѓани, независни уметници, занаетчиски здруженија итн.).

Работилницата се реализираше преку серија презентации (реализирани од експерти и соработници од земјава и странство) и интерактивен метод на работа во групи во кои активно се вклучија сите учесници.

Во рамките на работилницата се работеше на неколку различни нивоа. Пред сè се направи анализа на состојбите во полето на културата во општините од регионот Пелагонија, се работеше на градење на визија и цели за развој на културата во регионот, како и на дефинирање на акционен план за изработка на стратегија и план за културен развој на Пелагонискиот регион. На крај на работилницата се креираше координативно тело кое ќе го спроведува акциониот план за периодот кој следи. Изработката на стратегијата, планот и спроведувањето на активностите ќе придонесат кон поголема видливост на регионот, регионална координација на културната понуда и можност за поголема промоција во и вон рамките на земјата. 

Носителите на оската за Културна политика и културна размена се Центарот за нови иницијативи во уметноста и културата од Скопје – Локомотива и Регионалниот центар за култура, етнологија и техника – CRECET.

Локален партнер и координатор на активностите на регионално ниво во Македонија е Центарот за регионален развој на пелагонискиот плански регион.