Евалуација на програмата и дефинирање на стратегии за во иднина – завршен Управен одбор во Долна Нормандија

Од 19 до 21 септември 2012 година, кај плажата Омаха (плажите на сојузничкото истоварување), во Долна Нормандија ќе се одржи завршниот Управен одбор на петтата година од децентрализираната соработка меѓу Долна Нормандија и Македонија. Целта на формалната средба што ќе трае три дена е да се направи евалуација на досегашните активности и да се дефинираат стратегии за идниот тек на програмата.

За време на трите работни дена ќе се одржат повеќе партиципативни и креативни сесии со цел да им се даде можност на партнерите од Долна Нормандија и Македонија да направат резиме на сè што било постигнато во текот на второто триенале (2010-2013), да се дадат предлози за новата програма и да се идентификуваат и анализираат евентуалните проблеми. Партнерите ќе можат да ги споделат нивните искуства и креативност и на тој начин да придонесат за повторно дефинирање на целите на програмата. Сите замислени активности меѓу партнерите ќе бидат проткаени со меѓукултурна димензија.

Проектот е поддржан до Регионалниот совет на Долна Нормандија и француското Министерство за надворешни работи, а координиран од страна на Асоцијацијата на агенции за локална демократија (АЛДА). Активностите на програмата за 2012-2013 година се групирани во шест дела спроведувани од следниве француско-македонски „тандем организации“: 

- Оска 1: Дирекција за дигитален развој на територијата на Регионалниот совет на Долна Нормандија (ДН) и Метаморфозис (МК);

- Оска 2: Европска куќа – Долна Нормандија (ДН) и Коалиција на младински организации - СЕГА (МК);

- Оска 3: Национална асоцијација на градови со историја и уметност и градови со заштитени зони и сектори (ФР) и Асоцијација на градови од Македонија со архитектонско наследство (МК);

- Оска 4: Регионален центар за култура, етнологија и техника во Долна Нормандија - CRéCET (ДН) и Центар за нови иницијативи во уметноста и културата - Локомотива (МК);

- Оска 5: Центар за институционален развој (ЦИРа) (МК);

- Оска 6: Француски земјоделци за меѓународен развој - AFDI Долна Нормандија (ФР) и Федерација на фармери на Република Македонија - ФФРМ (МК).